Óli Magg og Sandra mættu með nemendur sína í fyrstu knapamerkjapróf vetrarins í Reiðhöllina í gær. Helga Thoroddsen prófdómari mætti kl. 17 til að taka út 13 nemendur. Í prófið mættu 10 konur og 3 karlar sem stóðust öll prófið með glæsibrag. 
Innilega til hamingju með það.

       
           Óli og Helga eitthvað að spá.....                                                       Didda í Litladal mætt í hringinn

      
       Sandra, Edda, Gummi og Helga                             Sigga, Anna Magga og Höskuldur
                    Þeir voru glaðir nemendur, kennari og prófdómari að aflokun góðu dagsverki.
             



Nú er hægt að kíkja á  YouTube og sjá verklegt Knapamerkjapróf 2 stig.

                                 

Nú er komið að loka mótinu í Grunnskólamótaröð hestamannafélaga á Norðurlandi vestra.

Það verður haldið í reiðhöllinni Svaðastöðum á Sauðárkróki

sunnudaginn 18. apríl kl. 13:00

Keppt verður í:

Fegurðarreið     1. - 3. bekkur

Tölt                        4. - 7. bekkur

Tölt                        8. - 10. bekkur

Skeið                     8. - 10. bekkur

Við skráningu þarf að koma fram keppnisgrein, nafn knapa, bekkur og skóli.

Nafn hests, aldur, litur og upp á hvora hönd er riðið.
Skráning þarf að berast fyrir fimmtudagskvöld 15. apríl á [email protected]

Skráningargjald er 1000 krónur á hest og 500 á næstu hesta og greiðist á staðnum áður en mót hefst.

Frekari upplýsingar hjá Smára í síma 8447285

Hér má sjá reglur Grunnskólamóts

Þá er KS-deildin búin þetta árið. Lokakvöldið var 7.apríl síðastliðinn og var þá keppt í smala og skeiði  og einnig réðust úrslit í heildarstiga keppninni.Í smalanum sigraði smalakóngurinn Magnús Bragi Magnússon og er þetta ekki í fyrsta skipti sem Magnús Bragi vinnur glæsta sigra í smalakeppni. Í skeiðinu sigraði Bjarni Jónasson eftir harða keppni við Tryggva Björnsson en þeir félagar þeyttust í gegnum höllinna á sama tíma 5,10 sek. sem er mjög góður tími, en Bjarni vann sökum þess að tími hans úr hinum sprettinum var betri en Tryggva. Með sigrinum í skeiðinu gulltryggði Bjarni sér sigur í KS-deildinni þetta árið. Stirkleiki á keppninni í ár var sennilega sá mesti frá upphafi deildarinnar og eflaust eigum við eftir að sjá marga af þeim hestum og knöpum sem hvað mest hvað að í KS-deildinni í vetur standa ofarlega á komandi landsmóti í Skagafirði í sumar.Úrslit úr smala og skeiði má sjá á flipanum ýmis mót - ks deild - úrslit - smali/skeið. Hér fyrir neðan eru heildarúrslit í KS-deildinni 2010. Tólf efstu knapar hafa unnið sér þáttökurétt á næsta ári.

	Stigasöfnun
	Knapar	Heild.stig
1	Bjarni Jónasson	34
2	Þórarinn Eymundsson	27,5
3	Ólafur Magnússon	24
4	Magnús Bragi Magnússon	21,5
5	Elvar E. Einarsson	21,5
6	Mette Mannseth	21,5
7	Ísólfur Líndal Þórisson	20,5
8	Sölvi Sigurðarson	16,5
9	Erlingur Ingvarsson	13
10	Þorsteinn Björnsson	10,5
11	Tryggvi Björnsson	8
12	Ragnar Stefánsson	6
13	Heiðrún Ósk Eymundsdóttir	2,5
14	Líney María Hjálmarsdóttir	2
15	Þorbjörn H. Matthíasson	2
16	Riikka Anniina	0
17	Viðar Bragason	0
18	Björn Fr. Jónsson	0

Æskulýðssýning Neista var í gær og tóku tæplega 40 börn, á öllum aldri, þátt í henni.

Elín Hulda Harðardóttir opnaði sýninguna á henni Móheiði sinni og var Elínu veitt viðurkenning fyrir frábæran árangur og framför á árinu 2009. Áttu þær stöllur margan góðan sprettinn á keppnisbrautinn 2009, urðu t.d. í 4. sæti í unglingaflokki á Fjórðungsmóti.


Elín Hulda og Móheiður á Landsmóti 2008


Elstu krakkarnir, 7 talsins, voru með 3 atriði, knapahreysti þar sem 2 lið kepptu sín á milli í ýmsum þrautum þar sem rauða liðið vann. Síðan var hindrunarstökk og svo var kennarinn þeirra Sandra Marín með sýnikennslu. Mjög skemmtilegt og flott hjá þeim.



Hanna Lindmark og Christina Mai náðu 17 indíánum og kúrekum saman í keppni. Þeir kepptu sín á milli í 2 mismunandi þrautum, annars vegar héldu þau á sigti með bolta í og riðu milli stika og hins vegar í slaufur milli stika. Mikil spenna var á síðustu metrunum og fór það svo að indíánar unnu sigtakeppnina en kúrekarnir slaufur, svo bæði liðin fengu verðlaun.



Minnstu krakkarnir, 12 talsins, voru trúðar, riðu berbakt og gerðu ýmsar æfingar á hestbaki, sneru sér við, stóðu upp og gerðu aðrar jafnvægisæfingar. Rosalega dugleg og flott. Sonja Noack hefur leiðbeint þessum krökkum í vetur.



Í lokin voru allir krakkarnir og kennararnir þeirra kallaðir upp þeim veitt smá viðurkenning fyrir frábæra frammistöðu, dugnað, áhuga og bara fyrir hvað við eigum flotta og duglega krakka. Við megum vera mjög stolt af þeim.



Æskulýðsnefndin þakkar öllum þeim sem að þessari sýningu kom á einn eða annan hátt fyrir, án ykkar hefði þessi sýning ekki orðið að veruleika. Gaman að geta átt frábæran og eftirminnilegan dag og fengið að njóta þess að horfa á frábæra krakka á frábærri sýningu. Takk fyrir öll.

Myndir eru komnar inn í myndaalbúm.
Helga Thoroddsen tók fullt af myndum og sendi okkur. Kærar þakkir fyrir.
Selma Svavarsdóttir tók líka nokkrar myndir. Kærar þakkir fyrir.

Lokamót Húnvetnsku liðakeppninnar verður eins og flestir vita á morgun í Þytsheimum og hefst klukkan 17.00. 104 keppendur eru skráðir til leiks og spennan er rosaleg.
Keppendur verða að vera búnir að greiða skráningargjald fyrir mót inn á 1105-15-200343 kt. 550180-0499, gjaldið er 1.500 fyrir fullorðna en 500 fyrir unglinga.

Dagskrá

Unglingaflokkur
2. flokkur
1. flokkur
B-úrslit í unglingaflokki
B-úrslit í 2. flokki
B-úrslit í 1. flokki
A-úrslit í unglingaflokki
A-úrslit í 2. flokki
A-úrslit í 1. flokki

Ráslista má sjá á heimsíðu Þyts  

Laugardaginn 10. apríl kl. 14.00
verður sýning á vegum Æskulýðsnefndar Neista
í Reiðhöllinni Arnargerði.

Fram koma um 40 krakkar á öllum aldri
sem hafa verið dugleg að æfa í vetur.

Hvetjum alla til að koma og sjá þessa
skemmtilegu sýningu hjá frábærum krökkum  

Aðgangseyrir kr. 500 fyrir 12 ára og eldri.

 

  Æskulýðsnefnd Neista

Námskeið á Miðsitju í Skagafirði um byggingadóma hrossa!    Búið er að opna fyrir skráningar ;-)

 

Lýsing: Bygging hrossa

 

Markmið með námskeiðinu er að bjóða upp á ítarlega fræðslu um byggingu hrossa og hvaða atriði er verið að meta þegar hver eiginleiki byggingar er dæmdur. Einnig verður farið yfir reglur kynbótasýninga og það hvernig best er að stilla hrossi upp í byggingardómi. Námskeiðið byggir að hluta til á fyrirlestrum en mikil áhersla verður lögð á verklegar æfingar.

 

Kennarar: Þorvaldur Kristjánsson og Eyþór Einarsson, kynbótadómarar.

 

Staður og tími:   Lau. 17. apríl kl. 10:30-17:00 (8 kennslustundir) á Miðsitju í samstarfi við Hrossaræktarsamband Skagfirðinga

 

Verð: 14.000 kr (kennsla, gögn, veitingar)

 

Skráningar hjá Landbúnaðarháskóla Íslands á [email protected]  eða í síma 433 5000 (fram komi nafn, kennitala, heimili og sími).

Staðfestingargjald: Staðfesta þarf skráningu með því að millifæra 3.000 kr (óafturkræft) á reikninginn 0354-26-4237, kt. 411204-3590. Senda kvittun á [email protected] með skýringu.

Unga fólkið hvatt til þátttöku í verðlaunaafhendingu á Landsmóti í sumar!

Elín Hulda, Harpa og Karen Ósk á Fjórðungsmóti 2009

Landsmót hestamanna sem haldið verður í Skagafirði dagana 27.  júní - 4. júlí hefur óskað eftir samstarfi við æskulýðsnefndir hestamannafélaga landsins í þeim tilgangi að virkja ungmenni og unglinga við verðlaunaafhendingu á mótinu.

Mælst er til að unga fólkið skarti félagsbúningi sínum við afhendinguna og geta áhugasamir haft samband við æskulýðsnefndir hestamannafélaganna en einnig er hægt að senda póst á  [email protected].

Í póstinum þarf að koma fram nafn og aldur ásamt upplýsingum um hvaða hestamannafélagi viðkomandi tilheyrir.

Styttist nú óðfluga í sýninguna Ræktun Norðurlands 2010. Útlit er fyrir að nokkrir magnaðir hópar frá hrossaræktunarbúum verði meðal sýningaratriða. Þar má nefna Garð í Hegranesi, en þaðan hefur hver gæðingurinn af öðrum komið nú á síðustu árum, þá verður hópur frá hinum þekktu ræktunarbúum Vatnsleysu í Skagafirði og Lækjarmóti í Vestur-Hún.

Síðan er von á frumlegri sýningu úr heimsmeistara ræktuninni á Íbishóli. Síðast en ekki síst skal nefna tvö bú sem bæði hömpuðu titlinum "Ræktunarbú ársins 2009" hvort á sínu svæði en það eru Steinnes í A-Hún. og Grafarkot í V-Hún. Sýningin fer fram n.k. laugardagskvöld (27. mars) í reiðhöllinni Svaðastöðum kl: 20:00.